Friday 16 December 2016

Tabm a Gernow 93 (Midwinter and high tide)

Degol Lucy a veu an terdhegves (13th) dedh a vis Kevardhû. Gool a wolowow ew. En termyn eus passys tho an jedh ma mantol gwav. An pagans a wrüg wolcubma gen golowow an dedhyow o hirhe. E'n jedh hedhyw thew mantol an kensa warn ügens (21st) a’n vis ma. Rag fra ma deffrans? An calendar Julian a veu chaunjys en 1752 dhe calendar Gregorian. Üdnek dedh a veu codhys dhort mis Gwedngala e'n vledhen na. Hedn’a veu an reson. Na wrüg mantol gwaya e’n vledhen saw an vledhen a wrüg gwaya adro dhe vantol!

Na veu odhom a wolowow e’n mis ma. Thera loor leun e’n nessa nos. Loor Yeyn henwys o hei. Gorloor o e’wedh. “Loor Yeyn” ew drefen an dedhyow a vedh moy yeyn alebma rag. Gorloor drefen boas an Loor ogas dhe’n Norves.


Ma loor leun o tedna an mor. Gen gorloor ma gorlanwes; ma mortid broas. Hedhyw, en mettin arvis, thera mortid pur ûhel. An mor a dowlas atal war an park kerry. Ev a dhros treth ha 
gobmon ha kewny dhe'n dor ha dhe'n stret e'wedh.


Otta lovan ha corden reb an vedhegva. Ma lies pollen magata.


Nag ew da gen edhyn kewer dhrog ha mor garow. Ma odhom a neb le rag sedha ha boas esy. Nag eus als vas obma, rag hedna ma'n gullys ma o sedha war to. 


No comments:

Post a Comment